31/08/2011 12:00:00 am - ກອງປະຊຸມປະຈຳປີຂອງອາຈານ, ພະນັກງານ ທົ່ວວິທະຍາໄລຄູ ສະຫວັນນະເຂດ |
ບໍລິຫານ ກອງປະຊຸມປະຈຳປີ ຂອງອາຈານ, ພະນັກງານ ທົ່ວວິທະຍາໄລຄູ ສະຫວັນນະເຂດ ສົກຮຽນ 2010-2011 ໄດ້ໄຂຂື້ນຢ່າງເປັນທາງການ ໃນເວລາ 8 ໂມງ 00 ນາທີ ຂອງວັນທີ 27/8/2011 ທີ່ຫ້ອງປະຊຸມ ວິທະຍາໄລຄູ ສະຫວັນນະເຂດ ໂດຍການເປັນປະທານຂອງ ທ່ານ ກຶ່ງ ໄຊຍະສານ ເລຂາຮາກຖານພັກ ຜູ້ອຳນວຍການໂຮງຮຽນ ໂດຍມີ ຄະນະພັກ-ຄະນະອຳນວຍການ, ຄະນະໜ່ວຍພັກຫ້ອງການ, ອາຈານສອນ ແລະ ພະນັກງານເຂົ້າຮ່ວມທັງໝົດ 167 ຄົນ, ຍິງ 78 ຄົນ ເຊິ່ງກອງປະຊຸມໄດ້ດຳເນີນການໃນ 4 ວັນ ແລະ ມີເນື້ອໃນຫຼາຍຢ່າງຄື: 1. ຮັບຮູ້ ແລະ ເຂົ້າໃຈການລາຍງານຜົນສຳເລັດ ຂອງກອງປະຊຸມ ປະຈຳປີ 2010 ຜູ້ບໍລິຫານການສຶກສາ ໃນທົ່ວປະເທດ, ກອງປະຊຸມຜູ້ບໍລິຫານ ສະຖາບັນສ້າງຄູ 2. ສະມາຊິກກອງປະຊຸມໄດ້ຮັບຟັງກ່ຽວກັບເນື້ອໃນໃໝ່ໃນມະຕິກອງປະຊຸມໃຫຍ່ຄັ້ງທີ IX ຂອງພັກເຮົາ. ສ້າງບາດກ້າວບຸກທະລຸໃນການພັດທະນາໃຫ້ເປັນຈິງ 3. ສະມາຊິກກອງປະຊຸມໄດ້ຮັບຮູ້ຄວາມສຳຄັນທາງດ້ານການສຶກສາໂດຍສະເພາະແມ່ນການສ້າງໂຮງຮຽນສີຂຽວແລະໂຮງຮຽນຄຸນະພາບເພື່ອເຮັດໃຫ້ການຮຽນ-ການສອນໄດ້ຮັບຜົນດີຂື້ນ. 4. ຮັບຮອງເອົາ ຜົນສຳເລັດໃນການປະຕິບັດວຽກງານ ໃນສົກຮຽນ 2010-2011 ແລະ ແຜນດຳເນີນງານ ໃນ ສົກຮຽນ 2011-2012 ນອກຈາກນັ້ນກໍ່ຍັງມີວຽກງານປັບປຸງອົງການຈັດຕັ້ງ ແລະ ນະໂຍບາຍຕ່າງໆ ເພື່ອເປັນການປັບປຸງສະຖາບັນໃຫ້ມີຄວາມເຂັ້ມແຂງສຸດທ້າຍສະມາຊິກກອງປະຊູມຮັບຟັງເອກະສານວັນຢຶດອຳນາດ 23 ສິງຫາ 1945 ແລະ 1975 ເພາະວ່າວັນດັ່ງກ່າວເປັນວັນທີ່ມີຄວາມໝາຍ, ຄວາມສຳຄັນທາງດ້ານປະຫວັດສາດຂອງຊາດລາວໃຫ້ຄູ-ອາຈານມີຄວາມເຊື່ອມຊືມຕໍ່ວັນປະຫວັດສາດດັ່ງກ່າວ. |